**ليه تفترى**
ياصاحبى ليه تفترى
وتبدّل المكتوب
للندل ليه تشترى
مع انه كله ذنوب
الدنيا ورتنى ياما
فى البشر اشكال
على كل لون تلتقى
وكل صنف له توب
فيه اللى توبه مرقع
وكل حته بلون
وفيه اللى توبه مجرجر
يلم عفش وطوب
وفيه اللى توبه يغنى
مع النسيم موال
وفيه اللى توبه حرير
من شكّه بيدوب دوب
واهى دنيا دانيه
بعبرها كلها امثال
والاصل بالفعل
مش بالشهره والمكتوب
الصخر ثابت
وما بتغيّرو الاحوال
والعفش طاير
وسايقه الريح معاه بيجوب
لكن ياصاحبى
قول الحق ولا تخافشى
ولا تهتم عمرك
ب ابو ضمير معيوب
******
ليست هناك تعليقات:
إرسال تعليق